A competición, que arrincou en decembro do ano pasado, contou coa participación de 7 equipos. Para José Prado, concelleiro de Deportes, o evento supón “un éxito” como un dos primeiros pasos para “dinamizar de novo o deporte local despois da pandemia” marcado por un “moi bo ambiente deportivo”. A semana que vén arrincará a Copa de Fútbol Sala.
O equipo do Pub Mhyto proclamouse campión da I Liga de Fútbol Sala de Melide rematada onte, 30 de marzo. Na competición, que arrincou o día 1 de decembro, tomaron parte un total de 7 equipos de Melide e da súa contorna. Tratouse do primeiro evento destas características para un deporte de ampla tradición local como é o fútbol sala.
Esta Liga, organizada polo Concello de Melide e coa colaboración de Club Melide F.S, foi recoñecida polo seu carácter social e inclusivo pola Federación Galega de Fútbol Sala. É a única competición deste tipo amparada en Galicia pola Federación. A participación estivo aberta a todas as persoas que así o quixeron, independentemente do seu xénero ou idade.
O edil de Deportes, José Prado, amosou hoxe a súa satisfacción pola celebración do campeonato, que valorou como “un exito”, “con total normalidade e con plena satisfacción por parte dos xogadores de todos os equipos, que me transmitiron a súa ilusión por poder participar na Liga”. Para o Goberno local, é salientable o bo ambiente en que discorreu en todo momento a competición e cómpre valorala moi positivamente.
A vindeira semana dará comezo a Copa de Fútbol Sala, que se desenvolverá ao longo de tres xornadas de mércores e unha cuarta en fin de semana con partidos eliminatorios.