Os disfraces e a fantasía toman as rúas con catro días de festas onde regresan os pasarrúas e o concurso de disfraces. Actividades para todas as idades durante as celebracións.
Melide celebra un ano máis as festas do Entroido máis divertidas, cunha completa programación dirixida a toda a veciñanza. Catro días de celebración onde salientan os espectáculos, o tradicional concurso de disfraces e, como non podía ser doutro xeito, a queima do Entroido.
As actividades dan comezo o sábado 1 de marzo no centro social coa actuación de Suso de Boente ás 17:30h, seguida dun divertido pasarrúas de Entroido que partirá ás 19h da Praza do Convento acompañado do Folión Grileiro, para rematar na praza das Coles cunha animada foliada con Herba Grileira e cunha degustación de produtos típicos desta festividade.
O domingo 2 de marzo celebrarase o afamado Concurso de Disfraces de Melide. Un ano máis, contará con tres categorías: Comparsas (grupos de máis de oito participantes), Grupos (de 3 a 8 persoas) e Individuais e Parellas. Repartiranse dous premios por cada categoría. Na de Comparsas, serán de 1.000 e 700 euros, respectivamente. En Grupos, o primeiro premio será de 400 e o segundo de 300 euros. Na categoría Individual e Parellas, os premios serán de 150 (1º) e 100 euros (2º). Ás 16:30h comezará a recepción de participantes no Cantón de San Roque, dando inicio o desfile desde o mesmo lugar ás 17:30h. O concurso celebrarase ás 18:30h no Pazo de Congresos. Se chove, todas as actividades pasarán a levarse a cabo desde as 17:30h directamente no Pazo. O xurado estará constituído por membros de diversas asociacións e entidades do municipio, así como persoas do mundo da cultura e as tradicións.
As inscricións para o concurso deben levarse a cabo antes das 14h do 28 de febreiro no departamento de Cultura municipal, ou antes do inicio do desfile, de 16:30h a 17h, no cantón de San Roque ou, en caso de choiva, no Pazo de Congresos e Exposicións.
O luns de Entroido, 3 de marzo, o Pazo de Congresos acollerá unha fantástica Festa Infantil de Disfraces. Dúas horas para as e os pequenos da casa que gozarán con xogos, baile, música e obradoiros variados. A festa comezará ás 17h.
O martes de Entroido, día 4 de marzo, celebrarase o emblemático Pasarrúas de Entroido, que partirá da Praza do Convento ás 19h acompañado de Gaiteiros do País. Unha hora despois, na Praza das Coles, haberá animación musical e unha deliciosa degustación de doces de Entroido e Chocolate. Ás 21h as festas chegarán á súa fin coa lectura do pregón e a queima do Entroido.
O Concello de Melide convida á veciñanza a desfrutar un ano máis desta intensa programación que enche de cor e alegría a nosa vila durante catro días inesquecibles.
